दैलेख । झोलुंगे पुलमा बिहान फसेका खच्चडहरूको उद्धार कार्य जारी छ।
दैलेख र अछामलाई जोड्ने खिड्की ज्युलाको झोलुंगे पुलको एकापट्टिको लठ्ठा चुडिदा विहान देखी फसेका १४ वटा खच्चडको नेपाली सेना, नेपाल प्रहरी र सशस्त्र प्रहरी, स्थानीय बासिन्दाको समेत सहयोगमा उद्धार कार्य जारी छ।
अछामबाट चामल लिन दैलेखको आठबीस नगरपालिकाको राकम बजार आउँदै गरेका १४ वटा खच्चड पुलमा फसेका थिए ।
अछामको पञ्चदेवल नगरपालिका र दैलेखको आठबीसलाई जोड्ने कर्णाली नदी माथिको उक्त पुलको एकछेउका लठ्ठा चुडिँदा खच्चड अड्किन पुगेका हुन। लठ्ठा चुडिँएको भागको पुल झुकेपछि १३ खच्चड जालीमा अडकेका हुन् ।
‘सुरक्षाकर्मी र स्थानीयले पुलको जाली काटेर खच्चडलाई कर्णाली नदीमा खसालिरहेका छौं, केही खच्चड तैरिएर किनारमा आए, केहीलाई डुंगामार्फत् निकालिएको छ,’ आठविस ६ का वडाध्यक्ष नवराज शर्माले भने।
उनकाअनुसार हालसम्म चार वटा खच्चडलाई नदीमा खसालिएको छ। नदीमा एउटा डुंगा राखिएको छ। उद्धार गरिएको खच्चडहरूको उपचारका लागि मेडिकल टिम बोलाइएको वडाध्यक्ष शर्माले बताए।
