भक्तपुर । सरकारले अघि सारेको ‘निरोगी नेपाल’ अभियान अन्तर्गत बागमती प्रदेशले ठूलो सफलता पाएको छ । प्रधानमन्त्री केपी शर्मा ओलीले आज एक कार्यक्रमबीच बागमती प्रदेशलाई पूर्ण खोप प्रदेश घोषणा गर्दै यसलाई सरकारको महत्वपूर्ण उपलब्धिका रूपमा उल्लेख गरे ।
प्रधानमन्त्री ओलीले संघ सरकारको स्वास्थ्य मन्त्रालयबाट प्राप्त प्रमाणपत्र प्रदेशका स्वास्थ्यमन्त्रीलाई हस्तान्तरण गरे । उनले स्वास्थ्य क्षेत्रको डिजिटल हेल्थ कार्यक्रमको पनि उद्घाटन गर्दै सरकार स्वास्थ्य पूर्वाधारलाई आधुनिक बनाउन लागेको सन्देश दिए ।
आफ्नो सम्बोधनमा प्रधानमन्त्री ओलीले भने, “अरु प्रदेशमा यस्ता अभियान सञ्चालन गर्न हामीले प्रेरित गर्नुपर्छ ।” उनले खोप अभियानले नेपालको अन्तर्राष्ट्रिय छवि बलियो बनाउने र विकासशील राष्ट्रमा स्तरोन्नति हुने लक्ष्यमा सहयोग पुग्ने विश्वास व्यक्त गरे ।
ओलीले अभियानलाई सफल बनाउन खट्ने स्वास्थ्यकर्मी र स्वयंसेविकालाई सम्मान गर्दै सरकार राम्रो काम गर्नेको सधैँ कदर गर्ने बताए । यो घोषणालाई संघीय र प्रदेश सरकारबीचको सफल सहकार्यको नमुनाका रूपमा पनि हेरिएको छ ।
